MTEMERE: Naibu waziri wa Maliasili na Utalii Mhe. Dunstan Kitandula(Mb) amemtaka mkandarasi Kampuni ya China Henan International Cooperation Group (CHICO) kutoka China inayojenga uwanja wa ndege wa Mtemere uliopo ndani ya Hifadhi ya Taifa Nyerere kukamilisha ujenzi kwa mujibu wa mkataba iliyowekeana na serikali.

Naibu Waziri ameyasema hayo wakati wa ziara ya kukagua Miradi ya Maendeleo inayojengwa na Mradi wa kuboresha usimamizi wa maliasili na kukuza utalii kusini mwa Tanzania(REGROW) katika hifadhi ya Taifa Nyerere.

Mhe. Kitandula aliwataka watumishi wanaosimamia miradi hiyo kuhakikisha kuwa miradi hiyo inakamilishwa kwa wakati na thamani ya fedha iliyotumika kujenga miradi hiyo inaonekana katika ubora wa miradi hiyo.

Aidha zaidi ya bilioni 40 zimetumika kufadhili miradi mbalimbali ya ujenzi katika hifadhi ya Taifa Nyerere ikiwemo ujenzi wa Uwanja wa Ndege, Kujenga makazi ya Askari ndani ya Hifadhi, kujenga sehemu za kulaza wageni, kujenga Lango la Kuingilia hifadhini pamoja na ununuzi wa mitambo ya kutengenezea barabara na magari kwa ajili ya shughuli za utawala.

Mradi wa Kuboresha Usimamizi wa Maliasili na Kukuza Utalii Kusini mwa Tanzania (REGROW) pamoja na ujenzi wa miundo mbinu mbalimbali ndani ya hifadhi hiyo, mradi umekuwa ukishiriki katika kukabiliana na migogoro baina ya binadamu na wanyamapori kwa kuwezesha mafunzo kwa VGS 150 kutoka katika vijiji 15 pembezoni mwa Hifadhi ya Taifa Nyerere.

"Kupitia uboreshaji huu wa miundombinu naiona hifadhi hii kuwa chachu ya kuongeza idadi kubwa ya watalii nchini lakini pia itapelekea kuchangia fedha za kigeni kwa wingi katika kapu la Taifa." Aliongeza Mhe. Kitandula.

Aidha Mheshimiwa Kitandula ameutaka uongozi wa Hifadhi ya Taifa Nyerere kushirikiana na viongozi wa vijiji ambavyo vinapakana na hifadhi hiyo hasa pale ambapo kunakuwa na changamoto ya wanyama wakali na waharibifu.