DODOMA: Naibu Waziri wa Wizara ya Ujenzi Mawasiliano na Uchukuzi Atashasta Nditiye amesema Mfuko wa Mawasiliano kwa Wote- UCSAF umeimarishwa ili kuhakikisha watanzania wote wanapata mawasiliano ya uhakika.

Nditiye amesema hayo jijini Dodoma katika ziara ya waziri wa ujenzi, mawasiliano na usafirishaji wa Zanzibar ya kutembelea mfuko wa mawasiliano kwa wote – UCSAF kujifunza.

Aidha Nditiye amesema kuwa serikali inaendelea kushughulikia changamoto ya muingiliano wa mawasiliano kwa maeneo ya mipakani ili kuondoa changamoto ya wananchi kupata mawasiliano kutoka nchi jirani.

Waziri wa Ujenzi, Mawasiliano na Usafirishaji wa Zanzibar Dr. Sira Ubwa Mamboya amesema lengo la ziara hiyo ni kujifunza na kupata uzoefu kutoka mfuko wa mawasiliano ili waweze kuboresha sekta ya mawasiliano Zanzibar

.Naye kaimu mtendaji mkuu wa mfuko wa mawasiliano kwa wote –UCSAF, Justina Mashiba amesema malengo ya kuanzishwa kwa mfuko huo ni ili kupunguza changamoto ya mawasiliano kwa wananchi hasa wa maeneo ya vijijini.