Tanga: Mtu mmoja jina Batuli Khalid,(KE) anashikiliwa na Jeshi la Polisi Mkoani Tanga kwa tuhuma za kumchoma mtoto wake wa kike kwa kijinga cha moto katika sehemu za siri na kumuharibu vibaya.

MKAZI huyo wa kijiji cha Kisiwani Nkumba, Muheza mkoani Tanga, anadaiwa kumchoma mtoto wake wa kumzaa, mwenye umri wa miaka minne (jina linahifadhiwa) ambaye anaishi naye katika kitongoji cha Ngomei Shule.

Mwenyekiti wa Serikali ya Kijiji cha Nkumba Kisiwani, Saidi Hassan, alisema juzi kuwa alipigiwa simu na mwenyekiti wa kitongoji cha Ngomei, John Bosco, pamoja na wananchi kwamba kuna mtoto amechomwa na moto sehemu za siri na mama yake mzazi.

Hassan alisema alipofika sehemu ya tukio, alimuhoji mama mzazi wa mtoto huyo kuhusu tukio hilo na kujitetea kuwa ameungua na uji sehemu za siri.

Alisema walimhoji mtoto huyo na kusema amechomwa na mama yake mzazi kwa kijinga cha moto, huku akiwaonyesha kinamama ili waone majeraha.

Hassan alisema mama huyo alimchoma mtoto kwa madai amekuwa hasikii anazurura ovyo mitaani na kusema kuwa atakuwa na tabia mbaya akaona amfunze kwa kumchoma na kijinga cha moto katika sehemu hizo.

Alisema baada ya maelezo ya mtoto, walimkamata mwanamke huyo na kumpeleka Kituo Kikuu cha Polisi Muheza na kufunguliwa mashtaka kisha mtoto kupelekwa katika Hospitali Teule ya Wilaya ya Muheza na kulazwa akiwa na shangazi yake ambako walilazwa na baadaye kuruhusiwa