Hakimu Mkazi Mkuu, wa Mahakama ya Hakimu Mkazi Kisutu, ameyakataa maombi ya upande wa Jamhuri katika kesi ya uchochezi inayomkabili Mbunge wa Singida Mashariki Tundu Lissu na wahariri wa gazeti wa la Mawio ya kuiomba Mahakama itoe hati ya kumkamata Lissu.

Wakili wa Serikali, Simon Wankyo Leo Jumatatu aliwasilisha maombi akiitaka Mahakama hiyo itoe hati ya kumkamata Mbunge huyo katika kesi ya uchochezi inayomkabili Mbunge huyo na wahariri wa gazeti wa la Mawio, Wankyo amedai mshtakiwa anaonekana akizunguka nchi mbalimbali akitoa mihadhara na huko Ubelgiji anakodaiwa yuko Hospitali haijaelezwa yuko hospitali gani. "Hati ya kumkamata mshtakiwa kwa sasa haiwezi kutolewa, hivyo nawaonya wadhamini kufika mahakamani kila kesi hii inapotajwa" amesema Hakimu Simba.

Simon amedai Februari 4, 2019, mahakama hiyo iliamuru wadhamini wa Lisu kufika mahakamani hapo kueleza hali ya mbunge huyo kwa kuwa Mahakama hiyo haina rekodi ya taarifa zaidi ya kusikia na kuona katika luninga. "Kama itakupendeza mheshimiwa hakimu tunaiomba mahakama yako itoe hati ya kumkamata mshtakiwa kwa kuwa tunamuona anazunguka nchi mbalimbali kufanya mihadhara," amedai Simon.

Pia, Hakimu Simba amewataka wadhamini wa Lissu ambao ni Ibrahim Ahmed na Robert Katula kuhakikisha wanahudhuria mahakamani hapo kila kesi hiyo inapokuwa Inatajwa. Hakimu Simba ameahirisha kesi hiyo hadi Machi 25, Mwaka huu kwa ajili ya kutajwa. Kesi hiyo ipo katika hatua ya usikilizwaji wa ushahidi wa upande wa mashtaka, lakini imeshindwa kuendelea kutokana na mshtakiwa wa nne katika kesi hiyo, ( Lissu )kuwa nchini Ubeljiji kwa ajili ya matibabu.

Mbali na Lissu, washtakiwa wengine katika kesi hiyo ni wahariri wa Gazeti la Mawio, Simon Mkina na Jabir Idrisa na Mchapishaji wa Kampuni ya Jamana, Ismail Mehbooh. Kwa pamoja washtakiwa hao, wanakabiliwa na mashtaka matano likiwamo la kuandika habari za uchochezi kinyume na Sheria ya Magazeti ya Mwaka 2002.

Wanadaiwa kutenda makosa hayo kati Januari 12 na 14, 2016 jijini Dar es Salaam, ambapo Jabir, Mkina na Lissu, waliandika na kuchapisha taarifa za uchochezi zenye kichwa cha habari kisemacho, ‘Machafuko yaja Zanzibar.’