Dodoma. Mbunge wa jimbo la Ulanga (CCM) nchini Tanzania Goodluck Mlinga amesema kuwa Mahabusu Katika Gereza la Ulanga Mkoani Morogoro wamekuwa wakisafirishwa kwa kutumia usafiri wa Bajaji au Bodaboda kwenda Mahakamani kutokana na ukosefu wa usafiri.

“Nilini Serikali itapeleka gari katika gereza la Ulanga,” amehoji Mlinga.

Kabla ya kumruhusu Naibu Waziri wa Mambo ya Ndani, Hamad Masauni kujibu, Spika wa Bunge, Job Ndugai akasema, “hii ni mpya kama mambo haya yapo.”

Akijibu, Masauni amesema watatatua changamoto ya ukosefu wa magari kadri yatakapopatika na kwamba yakipatikana watapeleka katika gereza la Ulanga.

Sambamba na Swali hilo Naye Mbunge wa Tarime Mjini (Chadema) Esther Matiko amehoji ni lini Serikali itapeleka nguo kwa ajili ya wafungwa.

Amesema katika gereza la Segerea jijini Dar es Salaam kutokana na kukosekana kwa nguo, jambo ambalo limesababisha askari wa magereza kuwapa nguo zao wanapotoka nje.

Akijibu swali hilo, Masauni amesema wafungwa wamekuwa wakipewa sare na kwamba changamoto hiyo itakuwa ikipungua hatua kwa hatua.