Dodoma. Madiwani 11 wa chama cha Demokrasia na Maendeleo ( Chadema) wa Jiji la Mbeya wakiwemo meya wa Jiji hilo, mchungaji David Mwashilindi wamehama Chama hicho na kuamua kujiunga na chama Tawala CCM hii leo.

Madiwani 10 kati yao ni wa kuchaguliwa kutoka kwenye kata mbalimbali na mmoja alikuwa wa viti maalumu ambapo wamedai kuwa wamekimbia magomvi katika chama chao cha awali.

Leo Jumatatu Februari 24, 2020, Katibu Mkuu wa CCM, Dk Bashiru Ally katika mkutano wake na waandishi wa habari mjini Dodoma aliwapokea madiwani hao akisema bado kuna kundi kubwa ambalo linakuja nyuma kutoka katika mikoa mbalimbali.

Dk Bashiru alitumia nafasi hiyo kumtumia salamu mbunge wa Mbeya Mjini (Chadema), Joseph Mbilinyi maarufu Sugu kwamba alimuahidi angewasha moto sasa kazi imeanza.

Katibu huyo amesema Sugu ni rafiki yake na kuwa alimuahidi angefunga mitambo, sasa kazi imekwishaanza na kuwa atakwenda Mbeya mapema kabla ya joto halijapoa ili akafunge kazi huko

Lakini naomba mje na mbinu, mikakati na siri mlizotumia huko, sisi tunawakaribisha na uzuri wa chama chetu hakuna mwanachama wa siku nyingi wala mpya, wote wana haki sawa ila kinachoangaliwa ni miiko na maadili, naomba mkajiunge kwenye matawi yenu ya CCM huko,” amesema Dk Bashiru.