Arusha: Waziri wa Mambo ya Ndani, Kangi Lugola amewataka polisi mkoani Arusha, kuacha tabia ya kuwabambikia kesi wananchi na badala yake wanapaswa kukamata wahalifu tu.

Kauli hiyo ya Lugola ameitoa katika mfululizo wa mikutano yake ya hadhara mkoani Arusha, katika wilaya za Arusha mjini, Arumeru na Monduli

Jana Ijumaa Februari 15, 2019, Lugola alisema wajibu wa polisi ni kulinda raia na mali zao hivyo ni wajibu wao kutimiza wajibu huo.

Lugola aliwataka polisi wa wilaya ya Arumeru, kuhakikisha wanakamata watuhumiwa wa ubakaji na wanaowapa mimba wanafunzi.

"Tunawataka watuhumiwa wote wa ubakaji kukamatwa na kufikishwa katika vyombo vya dola," alisema.

Lugola alitoa kauli hiyo, kutokana na malalamiko ya Mbunge wa Viti Maalum (CCM), Amina Mollel kuhusiana na kutokamatwa kwa watuhumiwa wa ubakaji na waliowapa mimba wanafunzi.