Kijana Mmoja maarufu NIGA akiwa na Mama yake Mzazi wamenusurika Kuuawa na wananchi katika Eneo la Kivule manispaa ya Ilala jijini Dsm kufuatia kijana huyo kutuhumiwa na wananchi hao kuendesha vitendo vya Uhalifu na Uporaji katika eneo hilo.

Kunusurika kijana huyo ambaye tayari alishapoteza fahamu kumefuatia baadhi ya wakazi wa eneo hilo kujichukulia sheria mikononi mwao na kumpa kipigo akiwa na Mama yake kunafuatia Mkuu wa wilaya ya Ilala Sofia Mjema ambaye alikuwa katika Msafara kupita eneo hilo ndipo alipoingilia kati kunusuru maisha ya kijana huyo.

Mama wa kijana huyo ambaye alionekana kumtetea mtoto wake akajikuta naye katika wakati mgumu baada ya wananchi hao kudai kuwa wamekuwa wakimuonya dhidi ya vitendo vya mwanaye bila mafanikio.

Licha ya Mvua kubwa iliyokuwa ikinyesha ilimlazimu Bi. Mjema kusubiri katika eneo hilo kwa zaidi ya saa moja Mpaka pale jeshi la Polisi walipofika kumchukua mtuhumiwa na kuondoka naye.