KATIBU Mkuu wa chama cha Jubilee Nchini Kenya Raphael Tuju amepelekwa katika hospitali ya Kijabe baada ya kupata ajali akiwa safarini kuelekea Kabarak kuhudhuria mazishi ya Rais Mstaafu Daniel Moi.

Hii ni baada ya gari alilokuwemo kugongwa na matatu(Daldala) iliyokuwa inalikwepa gari lingine katika eneo la Magina kwenye barabara kuu ya Nairobi-Nakuru.

Kamishna wa Kiambu Wilson Wanyaga amethibitisha kutokea kwa ajali hiyo akisema Tuju alitarajiwa kupelekwa Nairobi kwa matibabu zaidi.

Bw Tuju aliyekuwa katika gari aina ya Toyota Prado amepata majeraha kifuani na sehemu ya tumbo huku dereva wake akipata jeraha katika mkono wake.

Wawili hao hata hivyo, imeelezwa, wanaendelea vyema.