Dar es Salaam. Staa wa Muziki nchini Tanzania Nassibu Abdul maarufu kama 'Diamond Plutnumz' amefikishwa katika mahakama ya Ardhi Mwananyamala jijini Dar es salaam kwa tuhuma za uharibifu wa mali za ndani ya nyumba zenye thamani ya Tsh. Milioni 337.

Nyumba hiyo aliyokuwa amepanga kwa ajili ya studio(Wasafi Studio) maeneo ya Sinza Kijitonyama kabla ya kuhamia Mbezi, jijini Dar es Salaam huku akidaiwa pia na kodi ya mwezi mmoja.

Diamond amepelekwa Mahakamani hapo leo Jumatatu na mmiliki wa nyumba hiyo Bw. Maulidi Wandwe ambapo msanii huyo hakutokea mahamani huku wakili wake Gerald Hamisi alitoa taarifa kwamba mteja wake yupo nje ya nchi hivyo kutokana na ugonjwa wa Corona atarudi nchini baada ya wiki tatu.

Aidha wakili huyo wa Diamond aliieleza mahakama kuwa kutokana na muda kwenda amefanya mawasiliano na Meneja wake Babu Tale na kwamba watalifanyia kazi suala hilo na kuliweka sawa.

Kwa upande wa wakili wa Wandwe, Felix Buruda ameielezea Mahakama kuwa, wakili wa mlalamikiwaji Diamond maelezo yake ni mbinu ya kupoteza muda wangeweza kuwasiliana naye kwa njia ya barua pepe ili aweke mambo sawa.