Dar es Salaam: Dada wa mwanamuziki wa Hip Hop, Godzillah aliyefariki dunia leo Jumatano Februari 13, 2019 Joyce Mbunda, amesema Kaka yake siku moja kabla alikuwa analalamika kuwa kunakitu kilichokwama tumboni anahisi kukitapika lakini hawezi huku kikimnyonga na kulalamika.

Akizungumza leo nyumbani kwao Salasala jijini Dar es Salaam, Joyce amesema mwanamuziki huyo Golden Mbunda alikuwa akitapika kwa siku tatu mfululizo ndipo walipoamua kumpeleka Hospitali na wapofika alibainika kuwa na malaria, sukari kuwa juu na presha, madaktari wakamuweka drip kwakuwa amepoteza maji mengi.

“Jumapili (Februari 10, 2019) alilala muda mrefu, haikuwa kawaida. Baadaye akaomba barafu tulivyompa akaanza kutapika ndipo tulipompeleka hospitali na kugundulika ana malaria, sukari imepanda sana na presha imeshuka,” amesema. “Pia marehemu alisema kuna kitu kiling’ang’ania tumboni kama vile kinataka kutoka ila kinagoma, alijaribu kukitoa kwa kujitapisha lakini hakikutoka.” alisema Joice

Baada ya kupata nafuu baada ya matibabu alilalamika kitu hicho kuendelea kukwama tumboni. “Alipewa ruhusa ingawa alikuwa anaendelea kutapika. Usiku akaanza kuishiwa nguvu. Tukamrudisha hospitali akawekewa dripu mwisho akaandikiwa dozi ya siku 10. Alipofika nyumbani alisali kabla ya kuingia kulala lakini haikuchukua dakika 10 akaanza kuniita,” amesema.

“Nilimfuata chumbani nikiwa na mama, akatuambia naona watu wengi wananifuata wamezunguka nyumba wanataka kunichukua. Akainuka ghafla akasema acha nitoke nje, tukamshika maana alikuwa anaihangaika akamlalia mama na hakuinuka tena.” Amesema walimpeleka hospitali ya jeshi ya Lugalo wakiamini kuwa anaweza kuwa amezimia tu lakini waliambiwa amefariki dunia.

Godzilla ameacha simanzi kwenye muzi wa Hip hop nchini Tanzania watu wengi wakiwemo wanamuziki wenzake wameoneshwa kusikitishwa mno na kifo hicho