Chama cha ACT Wazalendo kimeamua kutengua uteuzi Afisa Habari wa chama hicho Suphian Juma kwa kile kilichodaiwa kuwa na mwenendo mbovu kwenye mitandao yake ya kijamii, ambao ACT imesema kuwa unadhalilisha hadhi ya chama hicho.

Taarifa ya utenguzi wa Afisa habari huyo imetolewa hii leo Mei 3, 2020 na Naibu Katibu wa Habari na Uenezi Bi Janeth Joel Rithe huku ikisema kuwa nafasi yake hiyo imekoma tangu jana Mei 2, 2020.

Taarifa hiyo kwa vyombo vya habari iliambatana na Barua ilitoka kwa katibu mkuu wa chama hicho Ndugu Ado Shaibu kwenda kwa Afisa habari huyo, ikimtaarifu kuwa nafasi yake kama Afisa habari wa Chama cha Act Wazalendo imetenguliwa kuanzia Mei 2, 2020.

"Unaarifiwa kuwa kutokana na mwenendo wako usiofaa kwenye mitandao ya kijamii, unaodhalilisha hadhi na taswira ya Chama, uteuzi wako kuwa Afisa Habari wa ACT Wazalendo umetenguliwa"- imesema sehemu ya barua.