Dar es salaam: Waziri wa Habari, sanaa, Utamaduni na Michezo Dr. Harrison Mwakyembe baada ya kukabidhiwa kijiti na Mtangulizi wake Mh. Nape Nnauye ameahidi kufanya mageuzi makubwa kwenye tasnia ya michezo nchini, Mwakyembea pia ametoa pongezi zake za dhati kwa shirikisho la soka nchini TFF kwa kazi kubwa ambayo inafanya katika kuendeleza mpira wa miguu nchini. pia Waziri amesema kuwa watanzania tunatakiwa kuondoa Desturi ya kuwa mateja wa nchini mbalimbali kwenye mpira wa miguu “Watanzania tumechoka na huu uteja, kusukumwa sukumwa tu kwenye soka. Ni hamu ya watanzania sasa tuonekane katika ulimwengu wa soka”, amesema Mwakyembe aliyezungumza na Kamati ya Hamasa kwa Serengeti Boys alipokutana nayo kwa mara ya kwanza jana Machi 25, mwaka huu.

Waziri alikwenda mbali kwa kuiagiza Wizara yake yote ijikite kuhakikisha maandalizi ya Serengeti Boys yanakamilika kwa wakati.

“Nataka Wizara yangu yote sasa wimbo wetu uwe Serengeti Boys,” amesema Dk. Mwakyembe.

Katika hafla hiyo, Dk Mwakyembe amempongeza mtangulizi wake, Mheshimiwa Nape Nnauye kwa kuunda Kamati ya Serengeti Boys ili kutoa hamasa ya Watanzania kwa timu yao.

Alisema Serengeti Boys ni nyota wanaoinukia (upcoming stars) na wanampa sababu ya kuanza kwenda mpirani tena.

Waziri Dk Mwakyembe aliendelea kusema kuwa michezo ya leo inahitaji uwekezaji hivyo Wizara yake itahakikisha kuwa jukumu hilo analibeba.

“Naona kama imechelewa, lakini bado muda upo, tukimbie, nataka Wizara nzima wimbo wetu uwe Serengeti Boys”, alisema kwa hamasa kubwa.

Dk Mwakyembe amempongeza Rais wa TFF, Jamal Malinzi na Mwenyekiti wa Kamati ya Serengeti Boys, Charles Hilary kwa mafanikio ya program ya mageuzi ya soka nchini.

Naye Mkurugenzi wa Michezo katika Wizara ya Habari, Utamaduni, Sanaa na Michezo, Yussuf Singo alisema sasa imechoka kuwa kichwa cha mwenda wazimu na hivyo Taifa limeazimia kucheza Kombe la Dunia kupitia vijana wa Serengeti Boys.