Dar es salaam: Daniel Kidega ambae ni SPIKA wa Bunge la Afrika Mashariki, amempongeza Rais John Magufuli kwa kazi kubwa ya kujenga uchumi wa Tanzania na amewataka wananchi wa Tanzania na Afrika Mashariki kwa ujumla wake kumuunga mkono kwa kazi nzuri anazo zifanya Rais magufuli.

Kidega alisema hayo Ikulu jijini Dar es Salaam baada ya kukutana na mwenyeji wake Dk Magufuli na kufanya naye mazungumzo yaliyojikita kujadili masuala mbalimbali yanayohusu maendeleo ya Jumuiya ya Afrika Mashariki ikiwemo kuimarisha uhusiano na ushirikiano baina ya nchi wanachama, kuinua hali ya uchumi na kutatua matatizo yanayozikabili baadhi ya nchi wanachama wa jumuiya.

“Nikueleze kitu kimoja, Tanzania na Afrika Mashariki tumebahatika sana kupata kiongozi kama Rais Magufuli ambaye anatuongoza vizuri, analeta maendeleo na mabadiliko,” alisisitiza Kidega.

Pia Rais Magufuli amefanya mazungumzo na Balozi wa Uingereza nchini, Sarah Cooke ambapo viongozi hao wamezungumzia namna Tanzania na Uingereza zitakavyoimarisha uhusiano na ushirikiano katika uwekezaji na biashara, mapambano dhidi ya Rushwa na dawa za kulevya, kuimarisha ukusanyaji wa mapato ya Serikali na kuimarisha huduma za usafiri wa anga

Dk Magufuli amemshukuru Balozi Cooke na kumhakikishia kuwa Tanzania itaendeleza na kuimarisha zaidi ushirikiano na uhusiano wake wa kihistoria na Uingereza katika kujenga uchumi imara wa Tanzania.

Aidha, Rais Magufuli amekutana na kufanya mazungumzo na Mwakilishi Mkazi Mpya wa Shirika la Fedha Duniani (IMF), Bhaswar Mukhopadhyay ambapo viongozi hao wamezungumzia juu ya shughuli mbalimbali za maendeleo zinazofanywa kwa ushirikiano wa Tanzania na IMF.