Kamati ya Hesabu za Serikali na Mashirika ya Umma (PAC) leo inakabidhi kwa Spika wa Bunge, Job Ndugai taarifa kuhusu bodi na menejimenti ya Benki Kuu ya Tanzania (BoT) inayotuhumiwa kutumia bima binafsi badala ya Mfuko wa Taifa wa Bima ya Afya (NHIF).

Hatua hiyo inakuja baada ya Jumanne iliyopita, Spika Ndugai kuagiza PAC kuihoji BoT kuhusu tuhuma hizo zilizotolewa na Mbunge wa Ulanga, Gudluck Mlinga (CCM).

Akichangia bajeti ya Wizara ya Fedha, Mlinga alisema fedha za matibabu kwa maofisa wa BoT kwa mwezi ni Sh bilioni 12, lakini wangekuwa wanatumia mfuko wa NHIF matibabu yao kwa mwezi yangekuwa Sh bilioni moja tu.