Aliyekuwa Waziri wa Mambo ya Nje katika Serikali ya Tanzania, Bernard Membe hii leo amechukua Fomu ya kuwania Urais wa Tanzania kupitia Chama cha ACT-Wazalendo.

Membe amechukua Fomu hiyo hii leo Julai 17, 2020 katika Makao Makuu ya Chama hicho yaliyopo Magomeni jijini Dar es Salaam kufuatia ombi la Wanachama na Mwenyekiti, Maalim Seif Sharif Hamad kumuomba kuwania Urais.

Akizungumza baada ya kukabidhiwa Fomu na Katibu Mkuu wa Chama, Ado Shaibu, Membe amesema uchukuaji wa Fomu hiyo ni mwanzo wa harakati za kuwania urais nchini, amesema atazungumza kwa kirefu zaidi siku ambayo atarudisha Fomu hiyo.

"ACT Wazalendo inakwenda chap chap chap! hatuwezi kuchelewa, nitatekeleza miongozo ya Fomu hii, na nitaijaza fomu hii vizuri sana kwwnye Nukta nitaweka kubwa, herufi ndogo nitaweka ndogo ili asipite mtu akisema sikujaza vizuri fomu hii.

nitatema cheche siku ambayo nitarudisha fomu hii, hapa nina mzigo kweli kweli", amesema Membe.

Membe amesema ameona jina lake la kwanza katika orodha ya wanaowania urais kupitia Chama hicho, amesema anashukuru kuwaanza yeye kuchukua Fomu hiyo hata hivyo wengine wanaruhusiwa kutokana na Demokrasia.

"Nitaheshimu kila mnalolitaka na ndio maana sikutaka kabisa kuchelewesha kutoa majibu, Wakubwa wako wanavyokwambia na kukuliza swali! Swali limeulizwa leo limejibiwa", amesema Membe.

Amesema anashukuru sana kwa kitendo cha Uongozi wa Chama, Wanachama wote kwa kumuunga mkono sambamba na Kiongozi wa Chama, Zitto Kabwe na Mwenyekiti, Maalim Seif Sharif Hamad.