Florida: Mwanamuziki wa Rap nchini Marekani Jahseh Onfroy maarufu kama XXXTentacion ameuwawa kwa kupigwa risasi na mtu mmoja ambaye hajafaamika mara moja mjini Florida nchini marekani.

taarifa zinasema kuwa jana jumatatu alikuwa anaondoka kwenye duka la kuuza pikipiki kusini mwa Florida pale mtu mwenye bunduki alipomfyatulia risasi.

Polisi katika tarafa ya Broward wanasema XXXTentacion, alikimbizwa hospitalini lakini akathibitishwa kufariki.

Alikuwa mara nyingi akielezwa kama mmoja wa wanamuziki wa rap wenye kuzua utata zaidi.

Alikuwa pia amekabiliwa na mashtaka ya kumshambulia mpenzi wake.

Rapa huyo, ambaye alipata umaarufu kwa kupakia nyimbo zake katika mtandao wa SoundCloud, alikuwa anatazamwa na wengi kama kielelezo cha mtu kufanikiwa kupitia kipaji chake.

Wapenzi wa muziki wake na wanamuziki nyota wa hip-hop wamekuwa wakituma salamu za rambirambi kuomboleza kifo chake.

Liwali wa tarafa hiyo amesema Onfroy alikuwa anaondoka kwenye duka hilo muda mfupi kabla ya saa kumi alasiri pale washukiwa wawili waliokuwa na silaha walipofika kwake.

Mmoja wao anadaiwa kumpiga risasi kabla ya wote wawili kukimbia eneo la tukio Deerfield Beach, takriban maili 43 (69km) kaskazini mwa Miami wakitumia gari aina ya SUV la rangi nyeusi.

Wachunguzi wanasema huenda kilikuwa kisa cha wizi wa mabavu.

Video iliyopakiwa kwenye mitandao ya kijamii ilimuonesha mwanamuziki huyo akiwa amelala ndani ya gari lake baada ya kupigwa risasi.